Дар наворҳо дида мешавад, ки чӣ гуна сокинони хобгоҳро ба зону ва дастон пушти сар аз утоқҳо берун мебароранд ва рӯ ба замин мехобонанд. Расонаҳои маҳаллии Русия навиштаанд, ки шоми 4-уми октябр як муҳоҷири 20-сола дар деҳаи Борск духтари 15-соларо, ки қаблан мешинохтааст, дар кӯча вохӯрда, талош кардааст, ӯро озори ҷинсӣ диҳад.
Духтари ноболиғ дар ин бора ба падару модараш нақл кардааст ва онҳо ба мақомоти ҳифзи ҳуқуқ муроҷиат кардаанд. То куҷо ҳақиқат доштани ин иттиҳом маълум нест.
Мақомот мегӯянд, гумонбар дар хобгоҳи кормандони корхонаи мурғпарварӣ зиндагӣ мекард. Барои боздошти ӯ нерӯҳои интизомӣ тамоми сокинони ин хобгоҳро тафтиш кардаанд. Мақомоти рус иддао доранд, ки дар ин хобгоҳ, илова бар гумонбар дар ҷиноят, ду муҳоҷири дигар низ ғайриқонунӣ ҳузур доштаанд.
Муҳоҷир ба талоши озори ҷинсии духтари 15-сола муттаҳам ва нисбаташ парвандаи ҷиноӣ боз шудааст. Муҳоҷирон дар гузашта дар посух ба чунин иттиҳомоти мақомоти рус гуфта буданд, ки бештар мавриди тӯҳмат қарор мегиранд ё мақомот як ҳодисаи одиро бузургтар ҷилва медиҳанд.
Назари муҳоҷири боздоштшуда дар бораи ин иттиҳом дастрас нест.